هر کس بوگون سو گورسه سالسون حسینی یاده
سـو یـولاّری بوگونـده باغلانـدی کربلاده
سعد اوغلی ویردی فرمان اول سنگدل صفوفه
کسـدی ره فــراتی اشــرار شـام و کـوفه
سُولدی بوگون سوسوزدان اطفال چون شُکوفه
اولاد مصطفانون اولدی غمی زیاده
سـو جامـی اللّـرینده اطفال ماه رُخسار
محزون و دلشکسته یکسـر بنات اطهار
آغلاردیـلار عطشدن بی‌یار و بی‌هوادار
باتمشدیلار ملاله اُول دشت پر بلاده
یوز ویردی اؤزگه بیرحال اول جمع بی‌پناهه
لب تشنه‌لر فغانی اوج ایتدی مهر و ماهه
یئتـدی علاوه بیر غم اول شاه کم سپاهه
شور و نوا اوجالدی صحرای نینواده
سولدی سارالدی گل‌تک اطفال ماه‌پاره
اظهـار حـال ایدوبلـه عبّــاس نامداره
عـرض ایلدی سکینه ایله عمـو نظاره
یوخ کیمسه اهل‌بیتی سالسون بو وقت یاده
اطـرافینی فراتــون اعـدای دیـن آلوبدور
سـوز عطش بناتی نه حاله گور سالوبدور
سو یوخدی خیمه‌لرده قیزلار سوسوز قالوبدور
غمدن بیزی کنار ایت بو دشت غم‌فزاده
اَبـر بهـار تک گُـور گوزلر نجه دولوبلار
بسکه سوسوز قالوبلار غنچه صفت سولوبلار
ایلوبلـه نالـه از بـس بی‌اختیـار اولوبلار
نـه صبـروار نـه طاقـت اولاد مصطفاده
دور مشگـوی گوتور بیر ایله گذر فراته
بیـر شربـه سوگتورسن بو تشنه‌لب بَناته
دریای غمـده غرقوخ سال کشتی نجاته
ای ناخدای دوران لطف ایت ره خداده
یوخ آل مصطفانون بیر کیمسه دادخواهی
سنسـن بو اهـل‌بیتین بـو عرصه‌ده پناهی
افـلاک اوج ایدوبـدی آل رسـولین آهی
بوسـوز و آه و نالـه تأثیـر ایدر جَماده
انصافدور مگر بو آخسون فرات اویاندا
پیغمبر اهل‌بیتی قالسون سوسوز بویاندا
یوخ شرم اهل‌بیتی بیله سوسوز قویاندا
نه رحم‌وار نه انصاف اعدای پر جفاده
«زایـر» مَـهِ عــزادور ایّــام غم‌فـزادور
صاحب‌عزا خدادور یازآغلا حق رضادور
بــو شــاه کربـلادور بیر منبع عطادور
اخلاصیله چوخ آغلا هر صبح و هر مَساده
کربلا زمزمه سی 2 – زایر محمّدی
