خیمه‌ده عمّه‌لریم قوردی عزاخانه بابا
منـده گلـدیم یانووا شام غریبانه بابا
****
بیر یانان خیمه سنون عترتیوه منزلیدی
بیر بیریلـه هامی ماتم زده‌لر همدلیدی
شمـع مَحفِـل اولارا شعلــۀ آهِ دِلیدی
جمعیـدی بیر نچـه پرسوخته پروانه بابا
****
قیزلارون قاتمیشیدی خون جگر گوز یاشینا
جاری ایلر دیله گوز یاشلارینی اوز باشینا
آنالار اوغلونـا اوخشاردی باجی قارداشینا
تک‌تک اولموشدولا اندوهیله همخانه بابا
****
اوچادردا بابا جان اوزگه بیر عالم قورولوب
اوزگه طرزیلـه بساط اَلـم و غم قورولوب
یاسلیلار یاسه باتوب مجلس ماتم قورولوب
هـره بیریانــدا گلـوب نالـه و افغـانه بابا
****
هره بیر سَمتده حسرت الی قوینوندا قالوب
باجی قارداشین آنالار بالاسین یاده سالوب
اصغـرین درد فراقی آنـامین صبرین آلوب
بالا وای دلـده توکـر اشگینـی دامانه بابا
****
هامـودان عـرشه چخـور نالـۀ یارب یارب
هر اوغول سوز آنانین دادینه لیلادی سبب
خَیْـل ثکلالــره سَرخیلــدی عمّـم زینب
سس ویرور شوریله هر دیده‌سی گریانه بابا
****
آغلادی شوریله از بس غمه باتدی بالالار
شیونیلـه بیبیمـون صبرین آزاتدی بالالار
دل دیدی دوتدی دله آخری یاتدی بالالار
چـوخ مُواظبـدی بیبیـم جمـع پریشانه بابا
****
گَـه سنـه نالـه ایدردیــم بابـا گـه قارداشیما
اورگیـم قاننـی قاتمشدیـم آخـان گوز یاشیما
شور عشقون گیجه وقتی ایله دوشدی باشیما
گیتدی سینمده توانیم داخی تالانه بابا
****
فکر دیداریله گوگلومده ز بس آرتدی شُعَف
جلوه‌لنـدی گوزومــه عــزّت ایّـام سَلَف
قویدوم ائوزشوریله بو قورخولی میدانه طرف
سو سَپَم وصلیله بو آتش هجرانه بابا
****
دولانـوردوم چولـی چـوخ وحشتله ناله‌کُنان
گه گیدردیم صاقا گه صول طرفه سرگردان
باشداکی شور منه مصرعووی ویردی نشان
تا یتوردوم اوزومی محضر جانانه بابا
****
باشیم اوستونده آچوب طایر دولت پر و بال
ایمدی که ایلمیشم من باباجان درک وصال
دور نـوازش ایلـه سنده منی آغوشووه آل
سالگلان لطفله مرهم دلِ سوزانه بابا
****
دوتولوب قلب ملـولیم منیـم ای شاه زَمن
دردِ دل ایتماقـا گلدیـم بو گیجه یانوه من
نولی بیر خوش دلیله سنده منی دیندیره سن
غصّـه‌دن خـالی اولا بو دل ویرانه بابا
****
یـارالی پیکریـوه حسرتیلـه مـن باخارام
یانـدروب شعلـۀ آهیلـه جهانـی یاخارام
سن باتان قانی دوتوب زلفومه منده یاخارام
بویانا خوشدی آتایله بالا بیر قانه بابا
****
بدنـون سَهلـدی ظلمیله قزل قانه باتوب
یاره‌لر گلدوله چوخ نیزه قلج خاری باتوب
بنزوری سنبله اوخلار بیله باش باشه چاتوب
مایۀ شوردی هر بلبل خواشخوانه بابا
****
نوکرون «تائبه» شاها ایله بیر عطف نظر
قویمـا آئینـۀ قلبیـن دوتـا چوخ رنگ کَدَر
او دِیر سالک اوخور واردی بوسوزده چوخ اثر
ایسته قورسونلا مُطافونده عزاخانه بابا
****
نچه ایلدور که «حسینی» ایلیوب ثبت کتاب
گل قیزیـم سینمـه گلمـه بیلـه افغـانه رباب
اوزی مأذون ایلدی «تائب» اونا یازدی جواب
منـده گلدیـم یانـووا شـام غریبانه بابا
آندیچمرم اوجانه- تائب تبریزی
