سالدی قرآن سسون آوازه بو مأوایه حسین
کوفه اهلی ایشیدوب گلدی تماشایه حسین
عاشقم گرچـه آنام اوغلی او شیـرین سخنه
ویرور هر لحظـه تسلّـی بو چتین وقته منه
ولی هر کس که گلوب دوردی تماشایه سنه
ووردی میـن یـاره دل عتـرت طـاهـایـه حسین
ازدحام ایتدی جمـاعت کسیلوب راه عبور
رخت فاخر گینوب مردم ایدر وجد و سرور
غرفه‌ده عورت اوشاقلار دف و نقّـاره چالور
داش آتـوب طعنـه ویـرالّار منـه لیـلایـه حسین
آلوب اطرافیمی غم فوجی اوزوم خسته و زار
خـوردا قـزلار مله‌شـور نـاقه‌ده بی‌صبر و قرار
جرس نـاقـه صـداسینـده عـزا نغمـه‌سی وار
گـلــه مـاتـم‌زده‌لــر بـلـکـه تسـلّایـه حسین
صبری مشق ایلمیشم ایتمرم هیچ وقته گله
یـارالـی قلبیمـی امّـا گتـورور کـوفــه دلـه
زینبـون یتمـز الـی تازه آخـان قـانی سیلـه
تـا جمـالون گلـه بیـر لحظـه تجلّـایه حسین
قاتلـون صورتـوی خـاک تنـوره بلیوب
دگوب آئینۀ رخسـاروی کول جلوه‌‌‌لیوب
فرصت دهر یتوب ظالمه طغیان ایلیوب
تُـف بیلـه گـردشه لعنـت بیلـه دنیایه حسین
پیشـواز ایلمـوسن عتـرت غـم‌پروروی
سالموسـان یـادوه لیلانـی علی‌اکبروی
گورمدون حیف اولا بو قافله‌ده اصغروی
سن بـولورسـن نـولوب اول دُرّ گـرانمایه حسین
سنی ئولدوردیلر چون عالمی تار ایلدیلر
نـاز پرورده‌لـری ووردیـلا خـوار ایلدیلر
سویـوب اهـل حرمـون ناقه‌سوار ایلدیر
بـاش آچـوخ زینبوی چکـدیله صحـرایه حسین
سن دونن فارغ اولوب مقصدوه یتمشیدون
ظهـر وقتیدی جدا اوسته عروج ایتمشیدون
گیجـه معلـوم دو معـراج حقـه گتمشیدون
بنــزیـوردی بـو گیـجـه لیـلـةالاسـرایه حسین
گوزومی اشک دوتـوب تیره‌لنوبـدور نظریم
شب اوّلـده دونـوب حـال خسوفـه قمریم
اودور اولـدوزلاریلان دوره‌لنوب دور و بریم
اوزلـرین اوخشـادالار بــو دوتـولان آیـه حسین
|
آندیچمرم اوجانه- یحیوی اردبیلی
