کثرت غمدن اولـوب ماتمسرا عالم بوگون
سید سجـاده زهرا ساخلیوب ماتم بوگون |
کوفه و شامی دولانـدی بو وطن آواره‌سی
اولمادی بیر دردینون امّا اولونجه چاره‌سی
کربلا زنجیرینـون بوینونـدا قالدی یاره‌سی
حقّـی وار آغـلار او حالـه دیـدۀ عالم بوگون |
سیـل اشگین صفحـه رخساره دائم باغلادی
سینه‌سیـن آه شـرر بـاریلـه یـاندی داغلادی
جان ویرنجه اوز آتاسین یاده سالدی آغلادی
هر گوزه باخسان عزاسینده اولار پُر غم بوگون |
عمـریـنـی آغـــلار گــوزیلــه ایلــدی آخـر تمام
میل ایدوب نه بیر سرین سو نه دویونجه بیرطعام
هـاردا سو گـورسیدی سویلردی سوسوز اُلدی بابام
قلبیمی داغلار منیم بو محنت اعظم بوگون |
هر اسیرین باغلی ال هـر چند قلبین داغلادی
باخدی هر کیم قید و بند ظلمه یاندی آغلادی
نـاقـه‌ده امّـا بـونـون دشمن ایـاقین باغلادی
بو مصیبت آرتـرور اهـل ولایـه غم بوگون |
اهل کوفه چکدی زنجیره تـن تبداریله
ایتدیلر بیمـاره حرمت زحمت و آزاریله
کوفـه‌ده زندانه گتدی عتـرت اطهاریله
اشگیله سالام او زخمین سوزینه مرهم بوگون |
آشنــالـر یـانــدی بــزم عــامـده بیگانـه‌دن
قتلینـه اقـــدام اولانــدا زادۀ مــرجــانـه‌دن
اولدی بیر سوزش نچه جاندان گچن پروانه‌دن
زینبـون حالـی ایدر احوالیمی برهم بوگون |
اهل شامیـن قـالموشام حیـرتده ظلم فاشینه
باخمیوبلر اول شهین گوزدن آخان گوز یاشینه
تـوکدولـر گـه اودلی نی‌لـر گـاه تپراق باشینه
بوجنایت فکری قالمور بیرکسه مبهم بوگون |
رسمــدور زنجـیـر دائــم الفـت ایـلـر شـریله
سلم محض اولموشدی باشینده اولان تقدیریله
بـزم شُـربـه ایتـدیلـر حـاضـر غــل زنجیـریله
پایۀ احکام او حالتدن اولوب محکم بوگون |
دلـده یـوخ یـارا اونون شـرح ایلیم هر محنتین
چوخ چکوب شامین یولوندا اهل بیتین زحمتین
خـاصّـه گُل یـوزلـی رقیه آلـدی دلـدن طاقتین
حالینی فکر ایلورم حالیم اولور برهم بوگون |
ویردی جان ویرانه یرده اولمادی دفن ایلین
گـوشه غربت قـوری یر نه گلن وار نه گیدن
اولـدی نه غساله نه قبرین قازان نه بیر کفن
ایلیوب امّا بنای عشقی مستحکم بوگون |
بـولمـورم نـه طـرزیله تنظیمدی برنامه‌سی
لوح تقدیره نه یازمیشدی مشیّت خامه‌سی
اللـر بـاغلی باشینـدا اود دوتوب عمامه‌سی
حقّـی وار یانسا او حاله عالم و آدم بوگون |
عشقـده از بـس واریـدی قــدرت خلّاقه‌سی
ریشه سـالمیشدی نهادینده محبّت ساقه‌سی
قبرینون اوستونده جان ویردی وفالی ناقه‌سی
ناقـۀ فکریــم ایـدر بو غـم اَلنـدن رَم بوگون |
تـک نــه منــدن پنجـۀ آلام آلار صبـر و قـرار
بوردا سسلر وای حسین وای اهل دل بی‌اختیار
ذوالجنـاح اوستــن دوشنـده قتلگـاهه زخمدار
عرض ایدوب یارب وفای عهدیدن شادم بوگون |
ایستدی چوخ روشن ایتسون اهل عشقه مطلبی
خیمگـاهـه گـلــدی دلـــده اَلظُّلیمــه مـرکبـی
زلـف تــک آشفتـه حـال ایتــدی وفـالی زینبی
سرّی وار زینب آدیله غم اولوب مدغم بوگون |
چون او مرکب راکبیندن تـاپدی شـرمنـده اوزین
قیزلارین حالین گوروب اشگیله دولدوردی گوزین
کاکلیندن اوپـدی بیر قیـز بیـر بالا اوپـدی یوزین
خلـدده یـانمـاز نجـه پیغمبـر اکـرم بوگون |
ذوالجناحین تا سسین آلـدی حـریـم اشگبار
بولماقـا حالیـن سکینـه خیمدن اولـدی کنار
گوردی بی‌صاحبدی یال و کاکلیندن قان آخار
صاحب عصرین اوقان ایلر سرشگین یَم بوگون |
سسلدی گـل عمه بـو آت گورنجه حسرت بـاخور
قلـب دنیـانـی شـرار آهـی بیـر اود تـک بـاخور
حالی چوخ پوزقوندی گوزدن اشگی دریا تک آخور
رشگ ایدر بو اشگِ چشمه چشمۀ زمزم بوگون |
بیـر نچـه مـدّت قـاباق ای سـرور عـالـی تبار
یـازموشام بـو نوحه‌نی افسرده حـال و اشگبار
ایمدی دوز بیر نیم قرن اولدی الیمده خامه وار
مـن فقیـرم لطفـوه نـه سائـلِ درهـم بوگون |
آندیچمرم اوجانه- حیدر خوندل
