شرط عشق چیست- و عاشق کیست (مُلحقات)

 

شورش که سالار عالمه شوریده سر عاشق

معشوق پـرست ایستر اولا هـر بشر عاشق

مالک اولا هر مامَلَکِ عالم عشقه

عالمده هامی مامَلَکندن گیچر عاشق

ترک وطن ایلر گوتورر اهل و عیالین

خائف یترقّب گیجه باشلار سفر عاشق

بر مرغ قطا تک بالالار زیر پرینده

صیّادین الندن ورار آهسته پر عاشق

یوز کعبۀ مقصوده طرف کعبیه مُحرِم

یولّاردا دیر غملره لبّیک‌لر عاشق

تا مأمن عالم ایدر اول مأمنی مسکن

احساس ایدر اوز عشقینه خوف و خطر عاشق

هولیله گینه دالدالانار حول حرمده

وقفه یتوشر فرصتی ویرمز هدر عاشق

باشلار قوتارار عمره طوافیله نمازین

سعینده گورر دوره‌ده بر شور و شر عاشق

ناچار قویار حجّنون اعمالینی ناقص

تکمیلین ایدر عشقیله مدّ نظر عاشق

تقصیرین ایدر کوفه دیارینده همان گون

اَل نایب خاصّندان او یردن اوزر عاشق

تقصیر ده معلوم اولونار سیرت حجّی

تحلیقه گوراخ نیلیه نیکو سِیَرْ عاشق

باغلار حرم کعبه‌دن احرام محبّت

اوز حجّنه لایق عرفاته کوچر عاشق

عشقیله گیجه گوندوز ایدر طیّ منازل

چوخ آز او اوزاق یولّاری منزل کَسَر عاشق

همره‌لرینی یولدا چه مسلم چه نصارا

بیراهه گیدنلر آراسندان سچر عاشق

ذی‌حج قوتارار شهر محرّم ایکیسنده

مقصودی اولان مقصد عشقه یتر عاشق

مجبور اولی صحرای بلایاده وقوفه

رسم عرفاتیله او چولده دوشر عاشق

تا نهّم شهرین یتوشر عصر زمانی

چیره سپه شامی گورر چیره‌تر عاشق

قرآن اوخویانلاردان آلار بر گیجه مهلت

قرآنه اوزی باشدان ایاقه سُوَر1 عاشق

تسخیر قیلار باختری خسرو خاور

اوردوی همایونه اولار ره‌سپر عاشق

مغربده جماعتله قیلار شام نمازین

ایلر شب عاشورینی مشعر خبر عاشق

بر شورش محشر قوپار اوندا بو خبردن

محشر چولنه مشعرینی دوندرر عاشق

خالی ایدر اغیاردن احباب حریمین

نامحرمی جانان حرمینده نیدر عاشق؟

ایستر که قالانلار هامی بی‌غَلّ و غش اولسون

غربال ثبات قدمیله اَلَر عاشق

بر جمع قدیم عهدینه پابسته قالاندان

پیمان اَلَستی او گیجه تازه‌لر عاشق

بر مجمع پروانه قورالّار دلِ شبده

شمع رخ زیباسین ایدر شعله‌ور عاشق

قرآن و مناجات و نماز اوسته دعادن

آخر گیجه‌سین عاقبت ایلر سحر عاشق

صبحین دمی ایلر گیجه‌نی چاک گریبان

چاک ایتمگه هر سینه‌نی باغلار کمر عاشق

قرمز شفق آفاق سپهره سپولنده

قانلار سپولر گوگلره حتمی بُلر عاشق

خورشید شفقدن که وُرار باش دیه‌سن بس

اوز قتلگهندن چوله ایلر نظر عاشق

تعجیلیله عشق اهلنه مخصوص منایه

قربان گوتورر قوچ قوزی ‌یتمیش نفر عاشق

تأخیره سالار قسمت رمیِ جَمَراتین

جایز بُلر اجراسینی طرز دگر عاشق

ساخلار صورا دشمنلر آتار اوستنه داشلار

رَمْیِ بو طریقیله بُلر معتبر عاشق

اعزازیله یوزمین نفر اشرارین الیله

ظهره کیمی قربانلاری بربر کََسَر عاشق

قربانلارینون بعضینه بازار وفاده

جانیم سنه قربان اولا قیمت ویرر عاشق

هر فدیه سینن باشین آلار قانلو دیز اوسته

مخصوص عنایتله ایدر مفتخر عاشق

لطفیله قویار یوز یوزه هر قانلو یوزیله

قویماز قالا بر دلده غبارکَدَر عاشق

لب‌تشنه گورر سو یرینه گوستری گوزده

اشگ تر و خوناب دل پر شرر عاشق

بی‌آب و علف وادی سوزانه سو اوسته

زمزم کیمی جاری ایدر اشگ بصر عاشق

قربانلقین آئینیجه آینه یرینده

آئینۀ رخسارین ایدر جلوه‌گر عاشق

جان اوسته او آئینیه هرکیم باخا سویلر

جانانه قسم جوهر جانه دگر عاشق

نمرود زمان حقّه آتان وقتیده پیکان

ماهی یرینه الده دوتار سودامر عاشق

آق اوّنوگی آق سینه‌ده آی پارچاسی طفلین

حلقندن آخان قانیله قرمز سُوَر عاشق

گورسه بو قان ایستر یره قان یاغدورا گویدن

اوندا گویه یردن بر اووج قان سَپَر عاشق

گلزارینه سولموش سارالان غنچه‌سین آخر

قرمز گل آچان غنچه کیمی قیترر عاشق

قربانلارینون ذبحنی باشه یتورنده

تحلیق ایلماق فکرینه فوراً دوشر عاشق

امّا نجه تحلیق که مثلین گورن اولماز

عالمده ولو عالم اولا سربسر عاشق

باش پارچالانار یاره‌لنر پیکر آخار قان

قاندان دیه‌سن قرمزی مخمل گِیَر عاشق

اثباتینه حقّیّتنون گوستری باشدا

ناحقلره بر معجز شقّ‌القمر عاشق

هر یاره گوزل بر گل آچار سینه‌سی اوسته

بر گلشن او گل یاره‌لریندن بَزَر عاشق

هر برگ گل اوستنده گونوز شبنم شب تک

قان قطره‌لرین قطره بقطره دوزر عاشق

بی‌خار گل اولماز اودی هر گل یاراسندا

بر خار خدنگ ستم اگلندیرر عاشق

هر خار جفا غارت ایدن بر گله خاطر

مین‌لر گل گلزار محبّت دَرَر عاشق

اوز نفسنه اجرای قضا و قدر اوسته

بر آز دا یانار اهل قضا و قدر عاشق

بر سنگ فلاخن قان ایدر تر قطراتین

گر توزلی جبین اوسته دوزه قانلو تر عاشق

سرگرم اولی دامانیله آنّین سیله باخماز

خلوتگه یاره آچار اغیاره در عاشق

بر پیک صفیریله بُلر طپش دلندن

غمخانۀ دل دربینه حلقه دَگَر عاشق

اوچ شعبه‌لی پیکانی بُلر پیک محبّت

معشوق یرینده اونا یر گوسترر عاشق

هیچ بر دلیله هیچکسه هیچ یرده دیولمز

درد دلینی نوک خدنگه دیر عاشق

داغ ثمر دل گورر آشفته دلنده

گورمز دله دل‌بسته‌لیقندا ثمر عاشق

دل نقشه‌سینی لوح وجودینده صفادن

اوچ شعبه‌لی پیکان جفادن سیلر عاشق

قلبندن ایکی عالمه بر روزن آچلسون

تیر سه‌پری حیطۀ دلدن چکر عاشق

داغ دلی یاره دیماقا لاله نه لازم

دلداره خدنگ اوسته دلین گوندرر عاشق

بر شاهد غیبی که اونی گوز گوره بُلمز

قانلو گوزیله روزن دلدن گورر عاشق

اوّل نظرینده رخ جانانی گورنده

مین منّتیله اُلماقا منّت چکر عاشق

تا واقف اولار عالم اسرارینه عشقین

دلدوز اوخیله لب لعلین تکر عاشق

امّید وصالیله آت اوستن یخولاندا

خاک ره خلوتگه یاری اوپر عاشق

اوز دوشدوقی یردن حرمه سعی و صفا ده

یرده سورونر یدّی قدم دیده تر عاشق

تشریف شه عشقه یارالی بدنینده

ترتیب ویرر تیریله طاق ظفر عاشق

قان چشمه‌سی تک یاره‌لرین قانی داشاندا

باشدان‌باشا اطرافینه داشلار دَرَر عاشق

اوخ نیزه قلج داش که ورار جسمینه اعدا

ایلر اولارا جسم لطیفین سپر عاشق

جان تشنه ویرر نهر فراتین سویون ایچمز

اوز نحرینی منحور گورر قان ایچر عاشق

عالملری بر پیرهنه گر ساتا معشوق

اگننده‌کی پیراهنی ویرمز مگر عاشق؟

بذل ایلر اوز انگشتر و انگشتنی باهم

تا غایت جودیله اولا مشتهر عاشق

بر سلسله گر سلسله‌بند ایستیه معشوق

هشتاده یاخون قیز گلین عورت توکر عاشق

حقّ اوسته قانی ناحق آخار قانی آلنماز

قبرینده یاتار مُنْتَظِر مُنْتَظَر عاشق

اُلمز ولو اُلدورسه‌له باش نیزیه گیتسه

بیگانۀ عشقین نظرینده اُلَر عاشق

ایستر گوره بیگانه مماتینده حیاتین

اعجازه وُرار چنگ ثبوت و سَمَر عاشق

تکبیر دیر گاه کسوک باشی جداده

باشسیزلارا شاماته اولار راهبر عاشق

گه کنج تنور ایچره یاتار بالشی کوللّر

عاشقلرینون باشینه کوللّر اَلَر عاشق

بر دیر هواسیله چخان بیت خدادن

قانلو باشیله دیره گیدر باش چکر عاشق

راهب دولانار مؤمن اولار دیری ده مسجد

بتخانه اولار کعبه گر ایتسه گذر عاشق

گه سیره چخار گونکیمی شام ایچره جداده

هر رهگذری کوچه‌بکوچه گَزَر عاشق

گه دعوی اسلام ایلین ملّت کفره

قرآن مجید آیه‌سی تفسیر ایدر عاشق

سرمست ایده ‌روم ایلچسینی بادۀ عشقی

شاماتده بر بزم شرابه گیدر عاشق

منزل ویرر اولادینه بر کُنج خرابه

اوز خوابگهین قصر ده بر طشت زر عاشق

مقصوره‌نشینان جهان کوری چشمی

ویرانیه تقدیم قیلار بر گُهر عاشق

معمُورۀ عشق ایلر او ویرانۀ عشقی

تا کاخ رقیبین ایده زیر و زبر عاشق

تا شأن خراباتی بُله اهل خرابات

پیرانه قویار خاک خراباته سر عاشق

الطاف حسینیدی بو «اشعار حسینی»

اسرار مفصّلدی ایدوب مختصر عاشق

چون مور آپارور پای ملخ الده چکامه

بر تحفه سلیمانه بَیَنْسَه اگر عاشق

چوخلار گیدر عالمده ره عشق ولیکن

هیهات حسین ‌بن‌ علی تک گَلَر عاشق

 

کربلا زمزمه سی 3- حسینی (سعدی زمان)

تاریخ ارسال : جمعه 7 مهر 1396
آخرین بازدید : دوشنبه 30 اردیبهشت 1398
تعداد بازدید کننده : 365
دفعات مشاهده : 370
» ارسال نظرات
متن پیام : *
نام :
تصویر امنیتی :
 
 
 

مناجات ماه رمضان

سرود میلاد امام حسن مجتبی علیه السلام

مناجات ماه رمضان

قال رسول الله صل الله علیه و آله و سلّم

حسن از من است و من از اویم؛ هر که دوستش بدارد، خداوند دوستدار او است.

(بحارالأنوار: جلد 43، صفحه 306)

مسئله روز

مسئله : اگر برای مسح، رطوبتی در کف دست نمانده باشد نمی‌تواند دست را با آب خارج، تر کند، بلکه (آقای سیستانی:... باید از ریش خود رطوبت بگیرد و با آن مسح نماید و گرفتن رطوبت از غیر ریش و مسح نمودن با آن محل اشکال است.) باید از اعضای دیگر وضو رطوبت بگیرد و با آن مسح نماید.

(آقای بهجت:... بنابر احتیاط باید اول از تری موی ریش و ابرو کمک بگیرد و اگر در آنها تری نبود از دست‌ها رطوبت می‌گیرد.)

آیت‌الله مکارم: اگر رطوبت کف دست خشک شود می‌تواند از اعضای دیگر وضو رطوبت بگیرد با آن مسح کند، ولی از آب خارج جایز نیست و اگر فقط به اندازۀ مسح سر رطوبت دارد سر را با همان رطوبت مسح کند برای مسح پاها از اعضای دیگر، رطوبت بگیرد.

 (توضیح‌المسائل‌مراجع،مسأله 257)

اینستاگرام

پنل کاربری

کلیه حقوق مادی و معنوی مطالب متعلق به موسسه هنر و ادبیات هلال می باشد
طراحی و برنامه نویسی گروه فاواتک